Azmat-e-zindagi ko bech diya
ham ne apni khushi ko bech diya
chashm-e-saqi k ik ishare pe
umr ki tishnagi ko bech diya
rind jam-o-subu pe hanste hain
shaikh ne bandagi ko bech diya
rahguzaron pe lut gai radha
sham ne bansuri ko bech diya
jagmagate hain wehshaton k darya
aql ne adami ko bech diya
lab-o-rukhsar ke iwaz ham ne
sitwat-e-khusrawi ko bech diya
ishq behrupiya hai ai 'Sagar'
ap ne sadgi ko bech diya
0 comments:
Post a Comment